Ymunodd De Cymru â chonfoi Gwasanaeth Tân ac Achub mwyaf y DU i ddarparu offer hanfodol ar gyfer Diffoddwyr Tân Wcráin

Llwyddodd y confoi mwyaf o Wasanaethau Tân ac Achub y DU hyd yma i gyflenwi offer diffodd tân hanfodol i’w cymheiriaid yn Wcráin yr wythnos diwethaf.

Ddydd Llun yr 22ain o Ebrill, gadawodd chwe pheiriant tân Wasanaeth Tân ac Achub De Cymru yn oriau mân y bore i ymuno â chonfoi a oedd yn cludo mwy na 2,800 o ddarnau offer a roddwyd gan Wasanaethau Tân ac Achub y DU.

Roedd maint y confoi diweddaraf a deithiodd i Wcráin yn ddigynsail; gan gynnwys 33 o gerbydau Tân ac Achub gyda dau gerbyd mecanyddol, HGV, 20 peiriant tân, wyth uned gorchymyn digwyddiad, un platfform ysgol awyr, ac un cerbyd 4×4.

Noddwyd dosbarthu’r offer gan y Swyddfa Gartref – gan weithio mewn partneriaeth â FIRE AID, Cyngor Cenedlaethol Penaethiaid Tân (NFCC), Gwasanaethau Tân ac Achub Cymru a Lloegr (ATA), a Chymdeithas y Diwydiant Tân.

Ymunodd 18 o wirfoddolwyr o Wasanaeth Tân ac Achub De Cymru â chyfanswm o dros 100 o wirfoddolwyr a adawodd Swydd Gaint Ddydd Mawrth y 23ain o Ebrill, gan gwblhau’r daith oedd dros 1,000 o filltiroedd o fewn yr wythnos.

Mae Gwasanaethau Tân ac Achub Wcráin wedi cael eu difetha gan effaith y rhyfel yn erbyn Rwsia, tra bod y gofynion arnynt wedi cynyddu. Mae ffigurau ar y 10fed o Ebrill 2024 yn nodi bod 396 o orsafoedd tân Wcáin wedi cael eu dinistrio, gyda 92 o rai eraill erbyn hyn mewn tiriogaeth wedi’i meddiannu. Mae 1,676 o gerbydau tân wedi’u dinistrio, 91 o Ddiffoddwyr Tân wedi’u lladd, 349 arall wedi’u hanafu, a phump mewn caethiwed. Yn y cyfamser, mae gwaith Ymladdwyr Tân Wcráin wedi tyfu’n sylweddol ers dechrau’r rhyfel, gyda thua 217,000 o adeiladau wedi’u dinistrio neu eu difrodi, 18,270 o danau wedi’u diffodd a 4,975 o bobl wedi’u hachub.

Dosbarthodd y confoi dros 2,800 o ddarnau offer gan gynnwys ysgolion, setiau offer anadlu,

offer diffodd tân ac offer ategol, offer gwrthdrawiadau traffig ar y ffyrdd, cychod, OAP tân a dŵr, a

offer gweithio ar uchder diogel.

Roedd yr offer yn cynnwys rhoddion o offer wedi’u datgomisiynu neu offer dros ben o’r DU sydd ar ddiwedd oes yn ôl polisïau ond sy’n dal yn ddiogel ac y gellir eu defnyddio o hyd. Mae pob rhodd yn cael ei gwasanaethu a’i gwirio cyn ei defnyddio. Yn y gorffennol, byddai offer o’r fath wedi’i sgrapio, ond trwy GYMORTH TÂN, mae llawer o eitemau’n cael eu hailddefnyddio a’u hail-bwrpasu ledled y byd mewn gwledydd lle mae eu hangen yn hanfodol.

Meddai Dean Loader, Cyfarwyddwr Cyflenwi Gwasanaethau Gwasanaeth Tân ac Achub De Cymru:

“Mae gweld effaith y dinistr ers i’r rhyfel yn Wcráin ddechrau yn syfrdanol , ac rydym yn teimlo bod cyfrifoldeb gyda ni i’n cydweithwyr rhyngwladol yn y Gwasanaeth Tân ac Achub i gynorthwyo lle gallwn ni. Mae cymwynasgarwch wedi bod yn gryf erioed Ne Cymru, ac fel arall byddai’r cerbydau a’r offer a roddwyd gennym wedi cael eu gwerthu neu eu sgrapio yn unol â’n polisïau gwaredu ddiwedd oes, felly rydym yn teimlo y byddant yn cael defnydd llawer gwell, gan gynorthwyo’r sawl sy wir ei angen.

“Ar ôl anfon confoi y llynedd, fe wnaethom wahodd tîm o’r Wcráin i gystadlu yn ein cystadleuaeth Cymdeithas Achub y DU (UKRO) yn Lincoln. Gall y cysylltiadau hyn a grewyd gennym bara am oes, ac rydym yn falch iawn ein bod wedi gallu cymryd rhan yn y confoi hwn.”

Ychwanegodd Darren Cleaves, aelod o dîm De Cymru a thîm rheoli confoi Chwilio ac Achub Rhyngwladol (ISAR):

“Dyma’r ail gonfoi i’r Wcráin y bues i’n rhan ohono, ac roeddwn i’r un mor awyddus i gymryd rhan y tro hwn. Ymunodd Gweinidog Plismona a Thân Llywodraeth y DU, Chris Philp, â ni yn Swydd Caint a siaradodd â’r gwirfoddolwyr yn helaeth, gan bwysleisio pa mor werth chweil oedd y genhadaeth yn ei farn ef.

“Roedd hi’n daith hir bedwar diwrnod ar draws Ewrop, fe wnaethom deithio 1,286 milltir o Bencadlys GTA De Cymru i’r man gollwng, ond roedd ein tîm yn hollol wych, ac nid oes modd cyfleu gwerth y daith mewn gwirionedd. Mae angen nerth arbennig i adael eich anwyliaid a theithio i gyrion parth rhyfel. Yn amlwg, roedd diogelwch yn hollbwysig, a chafodd yr holl wirfoddolwyr eu briffio’n llwyr cyn gadael, ond roedden ni i gyd yn falch o gael dod adre Ddydd Sadwrn ar ôl cenhadaeth mor anhygoel.”

Dywedodd Chris Philp AS, Gweinidog Troseddau, Plismona a Thân:

“Mae ymosodiad barbaraidd Putin ar Wcráin wedi effeithio ar bobl ddewr Gwasanaeth Tân ac Achub Wcráin a welodd eu hoffer a’u hadeiladau’n cael eu dinistrio, yn ogystal â llawer o Ymladdwyr Tân  yn colli eu bywydau.

“Rydym erbyn hyn wedi cyrraedd y drydedd flwyddyn o’r gwrthdaro disynnwyr hwn ac mae rhodd heddiw yn dangos ein bod yn benderfynol i gefnogi pobl Wcráin mor gryf ag erioed. Rhaid i bob gwlad yn y gorllewin wneud popeth o fewn eu gallu – mawr a bach – i helpu Wcráin i drechu goresgyniad Rwsia. Ni allwn ganiatáu i ymddygiad ymosodol ennill.

“Rwy’n wirioneddol falch o’r cyfraniad hwn ac rwyf eisiau diolch i’m cydweithwyr o fewn Gwasanaethau Tân ac Achub y DU sy wedi rhoi offer ac a fydd yn sicrhau llwybr diogel i’r confoi.”

Dywedodd David O’Neill MBE, Cadeirydd CYMORTH TÂN, David O’Neill MBE:

“Rwyf wrth fy modd bod sector tân y DU yn dod ynghyd unwaith eto i gefnogi Diffoddwyr Tân yn Wcráin. Dyma fydd ein seithfed confoi offer ers i’r rhyfel ar raddfa lawn ddechrau ac yn anffodus iawn, rydym yn gweld Diffoddwyr Tân yn cael eu targedu fwyfwy. Yn ddiweddar, lladdwyd tri Ymladdwr Tân yn ystod streic awyr a dinistriwyd gorsaf dân gyfan a’i holl offer.

“Rydyn ni’n gwybod y bydd y rhodd hon yn helpu i gefnogi gorsafoedd ledled Wcráin a gollodd eu hoffer i gyd a bydd yn eu galluogi i barhau i roi cefnogaeth hanfodol i’w cymunedau pan fydd ei angen. Mae’r effaith y mae ein rhoddion eisoes yn ei chael yn Wcráin yn amlwg, ond mae hwn yn rhoi mwy nag amddiffyniad corfforol i ddiffoddwyr tân; mae’n dangos nad ydyn nhw ar eu pen eu hunain ac mae’n rhoi gobaith a nerth iddynt barhau i beryglu eu bywydau eu hunain er mwyn achub eraill.”